Amihan ang nahimong panagang
[My column for The Freeman today, Feb. 22, 2021]
Sud sa unom ka oras, gikan sa severe weather bulletin sa PAGASA sa alas-5 gahapon sa kadlawon hangtod sa sunod nilang pahibawo sa alas-10 gahapon sa buntag, niirog ang bagyong Auring og 60 ka kilometro: Sa alas-5 nahimutang sa 395 ka kilometro sa silangang bahin sa Hinatuan, Surigao del Sur; ug pagka alas-11 nakit-an siya sa 335 ka kilometro gikan sa Hinatuan.
Sa ato pa, nidis-og si Auring og 12 ka kilometro matag oras. Susama ra sa kamang sa mga sakyanan nga natanggong sa huot nga trapiko sa kadalanan sa Metro Cebu.
-o0o-
Ang kahinay sa irog ni Auring, nga gihulagway sa PAGASA nga morang niungot sa kadagatan, nabantayan na sa niaging duha ka adlaw: Sa alas-10 sa buntag niadtong Biyernes, Pebrero 19, nahimutang siya sa 535 ka kilometro sa silangang bahin sa Hinatuan.
Sa ato pa, upat ra ka kilometro matag oras ang irog ni Auring sa niaging duha ka adlaw, mas hinay pa sa baktas sa makaluluoy nga mga kawani nga way kasakyan paingon sa ilang mga trabahoan tungod sa padayon nga paghigpit sa mga sakyanan nga pamasahero.
-o0o-
Ang pag-ungot ni Auring maoy hinungdan sa pagsige og usab-usab sa PAGASA sa ilang banabana kanus-a siya motugpa sa yuta sa Dinagat Island, o sa Homonhon sa Eastern Samar, o sa Leyte: Ang una nilang pangagpas niadtong Huwebes mao nga mo-landfall na siya sa Dominggo sa buntag.
Pagka Biyernes niingon na sila nga sa Dominggo sa hapon na ang landfall. Ug niadtong Sabado niangkon na nga ang labing sayo nga tugpa sa Dominggo na sa gabii, mahimo gani nga sa Lunes na sa kadlawon.
-o0o-
Nilawgaw sa agianan ni Auring, nga nagkinahanglan og init nga hangin aron mosutoy, ang bagang tapok sa bugnaw nga hanging Amihan nga, human nagwa-wa sa nangaging mga semana, nihabol sa Mindanao ug Kabisay-an.
Naluya si Auring nga nahimo nang several tropical storm uban ang 115 ka kilometro matag oras nga pag-unos. Mahimo gani nga mo-uk-ok sa pagka tropical depression nga kapin sa 50 ka kilometro matag oras ang huyop sa wa pay landfall. Sa di pa hingpit nga mapusgay ngadto sa pagka low pressure area human mobangga sa kabukiran sa Mindanao. [30] leolastimosaa@gmail.com
