[akong column sa The Freeman karong adlawa]
Pagkabasa nako nga ang di pa inilang composers ug mga mag-aawit gamay rag kita sa Spotify, diin gi-upload ang ilang mga kanta, kay nalubong sa minilyon ka nag-unang mga kanta ug wa silay paagi pagpabati sa ilang mga kanta sa mas daghan, nahinumdom kong Dr. Jose “Sir Dodong” Gullas.
Kon nia pa unta uban nato si Sir Dodong di siya maglangay sa pagtabang sa naapiking Sugbuanong composers ug mga mag-aawit. Kay dako ang kahigayonan nga apil sila sa nameligrong malumos sa kalibotanong gahong sa Spotify.
-o0o-
Sama sa naandan, nakahunahuna kog tinihik nga paagi: Matabangan ang mga Sugbuanon sa Spotify kon magsige kog patokar sa ilang mga kanta. Segun sa akong mga kaila sa industriya, mobayad ang Spotify og 15 sentabos sa composer ug mag-aawit sa kada stream sa ilang kanta.
Sa ato pa, nagkinahanglan og pito ka tokar sa kanta una mokita og P1 ug 67 ka tokar una makatigom og P100. Lisod nang abton kon pila ray mag-Spotify. Pero kon mas daghan tang maminaw sa Bisayang mga kanta kada adlaw mabuhi tingaling atong composers ug mga mag-aawit.
-o0o-
Nakatabang ang akong asawa ug iyang Spotify premium account. Nga maggamit sa unom ka devices. Human pakisaw-i sa duha namo ka higala, ang upat nga nahibilin gisumpay sa mga telepono ug voice-controlled virtual assistants sa Amazon ug Google.
Naghimo kog playlist sa karaang mga Binisaya ug laing playlist sa mga bag-o. Kada playlist may kapin sa 300 ka kanta. Kon patokaron sa virtual assistants 24/7, matokar ang tanang kanta ug kada usa mokita og 15 sentabos kada adlaw ug P1 kada semana.
-o0o-
Pero human sa usa ka adlaw ug tunga, gi-alingugngogan ko, bisan gipahinayan, sa bag-ong mga kanta. Gawas nga nagsurok akong dugo sa yungit nilang Binisaya.
Naghimo kog laing playlist ug maoy gipatokar tibuok adlaw ug gabii sud sa kapin na sa semana. Naglakip sa Binisaya nga mga kantang ganahan ni Sir Dodong. Ug sa 22 ka bersiyon sa Matud Nila ug 29 ka bersiyon sa Usahay. Para sa ganahang motabang sa Sugbuanong composers ug mga mag-aawit ug mopasidungog ni Sir Dodong, akong i-share ning playlist, “Saluma ni Dodong” http://spoti.fi/30B8ROm. [30] leolastimosaa@gmail.com
